వంటింటి కుందేలు అనడం న్యాయమేనా?

"వంటింటి కుందేలు" ఈ మాట ఎవరన్నారో నాకు తెలీదు కానీ, ఆ మాట అన్నవారు ఆ తర్వాతి నుంచి తామే వంట వండుకొని తిన్నారో లేదా వాళ్ళు పేర్కొన్న వంటింటి కుందేళ్ళతో వండించుకొని తిన్నారో అన్న విషయం నాకు తెలియదు. కానీ ఆ ఒక్క మాటతో అప్పటిదాకా ఎన్నో వేల సంవత్సరాలుగా కుటుంబానికి సేవలందించిన స్త్రీలను అవమానించారని నా అభిప్రాయం. కుటుంబ సభ్యుల ఆరోగ్యం మొత్తం తినే తిండి మీదనే ఆధారపడి ఉంటుంది. మరి అంతమంది ఆరోగ్యాన్ని రక్షించే బాధ్యత ఎవరో ఒకరు తీసుకోవాలి కాబట్టి ఈ సమాజంలో స్త్రీ అనే వ్యక్తి తీసుకున్నారు. ఆ వంటకు కావల్సిన సరంజామాను తెచ్చే బాధ్యత పురుషుడు తీసుకున్నాడు.

నేను గమనించినంతలో, కుటుంబం మొత్తానికి వంట చెయ్యాలంటే రోజూ దాదాపు ఎనిమిది గంటలనుండి పదిగంటల సమయం కేటాయించవలసి ఉంటుంది (including పాత్రలు తోమడం వగైరా). అంత సమయం కేటాయిస్తూ ఇతర పనులు చెయ్యాలంటే కష్టమే కాబట్టి ఒక జాతి మొత్తం ఆ ఒక్కపనికే అంకితమయ్యింది అనుకుంటున్నాను. కానీ రాను రానూ ఆ పనిమీద చులకన భావం ఏర్పడి ఉండొచ్చు. ఎందుకంటే, ఆ పని చేసేవారు ఖచ్చితంగా ఇతరుల మీద ఆధారపడవలసి ఉంది కాబట్టి. సంపాదించేవాడు ఎక్కువ, ఇతర పనులు చేసేవారు తక్కువ అన్న అభిప్రాయం తప్పు అని చెప్పడానికేనేమో వేమన గారు "చీపురుతో శుభ్రపరచడం, ఆఫీసులో పని చెయ్యడం..రెండిట్లో ఏదీ తక్కువ కాదు, అన్నీ సమానమేనంటూ ఏదో పద్యం చెప్పారు. నాకు గుర్తు లేదు.

ఇప్పుడీటాపిక్ మీద టపా రాయడానికి కారణమేమిటంటే, మొన్నామధ్య ఒక విషయం తెలిసింది. కొద్దిమంది వారానికి కనీసం మూడు రోజులైనా ఇంట్లో వండుకోవాలనే నియమం పెట్టుకున్నారట. కారణం అందరికీ తెలిసిందే, ఎవరి పని వాళ్లది, ఎవరి ఇగో వాళ్ళది. అరె! సంపాదన కోసం వంటకు ఇంత లీస్ట్ ఇంపార్టెన్స్ ఇస్తున్నారా అనిపించింది.

బహుశా అందుకేనేమో ఈ మధ్యకాలంలో ఇబ్బడిముబ్బడిగా రెస్టారెంట్స్ వెలుస్తున్నాయి. ఈకాలంలో ఫుడ్ బిజినెస్ పెట్టుకున్నోడు ఎవ్వడూ నష్టపోడు. నాదీ గ్యారెంటీ. కానీ, ఆ రెస్టారెంట్స్‌లోనూ, ఫైవ్ స్టార్ హోటల్స్ లోనూ తినేవి రుచికరంగా ఉంటున్నాయా, కడుపు నింపగలవా?

ఆకలైనప్పుడు హైద్‌లో ఏ రెస్టారెంట్‌లో తినాలీ, ఏ హోటల్లో బఫే బాగుంటుంది అని ఎక్కడక్కడో ఊరంతా తిరిగేవాళ్లం. ఎంత ఖర్చుపెట్టినా బఫే పేరుతో పీకల్దాకా మెక్కినా ఏనాడూ ఎవ్వరమూ కూడా సంతృప్తి చెందలేదు. ఇంట్లో చేసుకునే పచ్చడి మెతుకులకు అన్నీ క్రిందే అనిపించాయి.

స్త్రీవాదులవల్లనైతేనేమీ, ఇతర వాదులవల్లనైతేనేమీ వంట పని మీద చులకన భావం చాలామందిలో ఏర్పడిందని అనుకుంటున్నాను. ఆడది అబల కాదు, సబల, శక్తి, శాకినీ, ఢాకిని అని నూరిపోసి నాలుగ్గోడల మధ్య వంట చెయ్యడం తప్పు అనే అభిప్రాయం ఎక్కించడంలో కాస్తో కూస్తో సఫలమయ్యారని అనుకుంటున్నాను. ఆర్థికంగా తమ కాళ్ళమీద నిలబడ్డమనడంలో తప్పులేదు, కానీ ఇక్కడ అలాకాకుండా బలప్రదర్శన చెయ్యడం స్టార్ట్ చేశారు. మగాడు అంతరిక్షంలోకి వెళితే ఆడదీ వెళ్ళింది చూశారా...మగాడు మందుకొడితే మేమూ కొట్టాం అంటూ ఒకరినొకరి మధ్య బలప్రదర్శనలెక్కువైపోయాయి తప్ప ఫలానా విధంగా స్వంతంగా కాళ్ళమీద నిలబడితే ఉపయోగం ఏమిటీ అని స్పష్టంగా చెప్పడం నేను చూడలేదు. ఎవరి మీదనో ఆధారపడితే ఆ ఆధారం ఏ కారణం చేతనైనా కూలిపోతే పరిస్థితి ఏమిటి? అందుకే స్వంతంగా సంపాదించే నేర్పు కలిగి ఉండాలి అని చెప్పడం నేను చాలా తక్కువగా చూశాను.

(బ్లాగుల్లో ఇటువంటి టపా రాయడం ఇదే మొదటిసారి. ఇప్పటికే పెద్దదైపోయింది. సశేషం)